Портал "Дивное Дивеево"

Страничка монастыря расположена здесь - www.4udel.nne.ru

Тропарь,Глас 4 Творче и Создателю всяческих, Боже, дела рук наших, ко славе Твоей начинаемая, Твоим благословением спешно исправи, и нас от всякаго зла избави, яко един всесилен и Человеколюбец. ...
На главную Новости Акафист и Канон святому Апостолу Варфоломею
Акафист и Канон святому Апостолу Варфоломею
06/09/2018 21:46:11

Акафист святому Апостолу Варфоломею
Память: 05 мая (22 апреля ст. ст.); 24 июня (11 июня ст. ст.); 07 сентября (25 августа ст. ст.)


Апостол Варфоломе́й (Нафана́ил)


Кондак 1
Избранному от людей израилевых во Христова Апостола на уловление человеков, чудному Варфоломею, пения похвальная принесем, вернии, яко оставльшему дом свой, нищету Христову возлюбившему и Христово учение паче учения еврейских книжников избравшему. Ты же, святый Апостоле, всех нас, память твою честную празднующих, не остави своим предстательством и заступлением, да благодарными устнами вопием ти: Радуйся, святый славный и всехвальный Апостоле Варфоломее.

Икос 1
Ангелов Господь и Спаситель всего рода человеча, провидев чистоту души твоея, святый Варфоломее, благоволи избрати тя во единаго от обоюнадесяте и нарещи Апостолом Своим. Мы же, дивящеся духовным дарованиям твоим, прославляем тя сице:
Радуйся, Варфоломее, великий Христов Апостоле.
Радуйся, учениче Христов усерднейший.
Радуйся, яко сердце свое непорочно имел еси.
Радуйся, яко лукавыя наставления старцев еврейских отвергл еси.
Радуйся, яко всем сердцем своим Христу прилепился еси.
Радуйся, яко вся мирския блага ни во чтоже вменил еси.
Радуйся, яко отца и матерь, братию и сестры своя ради Господа оставил еси.
Радуйся, яко во следовании за Христом истинное блаженство восприял еси.
Радуйся, учением Христовым пленивыйся.
Радуйся, в пути Христовом благо Царствия Небеснаго предвкусивый.
Радуйся, благогласнейший проповедниче Христова учения.
Радуйся, верный слуго Господь.
Радуйся, святый славный и всехвальный Апостоле Варфоломее.

Кондак 2
Видя чудная дела Господа своего и Учителя и слыша из уст Его исходящее небесное учение, ясно уразумел еси, святый Варфоломее, со Апостолом Петром и прочими Апостолы вкупе, яко глаголы живота вечнаго Учитель ваш имать, и яко Он есть воистину Сын Бога Живаго, Емуже вся земля едиными усты взывати научается: Аллилуиа.

Икос 2
Разумному Солнцу Правды вседушевно восхотел еси, святый Апостоле Варфоломее, поработати и радостно приял еси заповедь Господа о проповеди овцам погибшим дому Израилева; сего ради потщался еси со всеми Апостолы по весям и градом Израилевым ходяще, болящия исцеляти, прокаженныя очищати, мертвыя воскрешати, бесы изгоняти и всем проповедати и вещати, яко приблизися Царствие Небесное. Воспоминающе апостольския труды твоя, сия похвальная восписуем ти:
Радуйся, усердный заповедей Христовых исполнителю.
Радуйся, всего себе Господеви послушно поработивый.
Радуйся, яко не стяжал еси ни злата, ни сребра, ни меди при поясе своем.
Радуйся, яко ни пиры в путь, ни двою ризу, ни жезла с собою, по заповеди Христа, не брал еси.
Радуйся, яко мир Христов в домы вносил еси.
Радуйся, яко с добрыми добре пребывал еси.
Радуйся, яко от неприявших мира Христова паки себе мир приимал еси.
Радуйся, яко учение Господа своего усердно проповедал еси.
Радуйся, ты бо, по слову Христову, яко овча посреде волков с Евангелием шествовал еси.
Радуйся, яко болезни неисцельныя целил еси.
Радуйся, яко духов лукавых изгонял еси.
Радуйся, яко прокаженныя очищал еси и мертвыя воскрешал еси.
Радуйся, святый славный и всехвальный Апостоле Варфоломее.

Кондак 3
Сила духовная Божественнаго учения всесовершенно плени тя, славный Варфоломее, сего ради никояже сладости мира сего восхотел еси вкушати, токмо единаго истиннаго блага желал еси присно наслаждатися, во еже слушати словеса Учителя своего, созерцати сладкий лик Господа своего, зрети дивное служение Его скорбящим и обремененным и во веки со всеми избранными Его взывати Ему ангельскую песнь: Аллилуиа.

Икос 3
Имея богатство неизреченныя благости, Спас мира и Господь, ведый, яко прииде Ему час, да прейдет от мира сего ко Отцу, тайноводствова Своя, сущия в мире, ученики, показуя им прежде Креста Своего путь добрейший смирения, начат умывати нозе другом Своим и отирати лентием; таже хлеб и вино благослови Господь и Таинство Причащения в Церкви Своей на веки утверди. Сия видев святый Варфоломей с прочими Апостолы, всем сердцем своим вожделе Учителю своему подражати и, в Его воспоминание, Святое Таинство Причащения присно совершати. За таковое твоего сердца благое изволение ублажаем тя, святый Апостоле, восхвалениями сими:
Радуйся, добрый и послушный Христов учениче.
Радуйся, благоговейный исполнителю Христовых заповедей.
Радуйся, яко сподобился еси прияти омовение ног своих от Господа твоего и Учителя.
Радуйся, яко на Тайной Вечери Тела и Крови Христовых приобщился еси.
Радуйся, Христову тайноводству научивыйся.
Радуйся, заповедь новую от Господа приявый, во еже душу свою положити за други своя.
Радуйся, смирения Христова истинный служителю.
Радуйся, словом Христовым очищенный.
Радуйся, за Господа и Христа жизнь свою положити обещавый.
Радуйся, любве Христовы проповедниче.
Радуйся, о всем мире теплый к Богу молитвенниче.
Радуйся, всех скорбящих и обремененных заступниче.
Радуйся, святый славный и всехвальный Апостоле Варфоломее.

Кондак 4
Буря велиих смущений найде на тя, святый Апостоле, егда видел еси Господа своего и Учителя от предателя лестию лобзаннаго, в руце лютых и беззаконных судей преданнаго и на смерть позорную осужденнаго; егда же услышал еси святых жен мироносиц, радостную весть о Воскресении принесших, и егда своима очима сподобился еси зрети воскресшаго Господа, язвы Своя на пречистем теле Своем показующаго, тогда со всеми Апостолы, печаль свою на радость преложив, воззвал еси велегласно Господу Христу, из мертвых воскресшему: Аллилуиа.

Икос 4
Слышал еси, славный Варфоломее, Божественныя глаголы Господа, по воскресении Своем отверзшаго Апостолом ум разумети Писания, яко тако подобаше пострадати Христу и воскреснути из мертвых в третий день; видел еси Господа своего с горы Елеонския во славе вознесшагося и с радостию велиею возвратился еси во Иерусалим, хваля и благословя Бога. За таковое твое радостное прославление Господа, паки во славе грядущаго судити живым и мертвым, воспеваем ти, святый Апостоле, похвалы сицевыя:
Радуйся, воскресшаго Господа видети сподобивыйся.
Радуйся, гвоздиным язвам на пречистем теле Его усердно поклонивыйся.
Радуйся, яко во Христовом воскресении уверился еси.
Радуйся, яко явлением Его всесладким мудрости и разума исполнился еси.
Радуйся, со Христом, по воскресении Его, общия трапезы насладивыйся.
Радуйся, от Него Писания пророческая разумети научивыйся.
Радуйся, на горе Елеонстей, яко в преддверии небеснем, со Учителем своим обретыйся.
Радуйся, благословение Господне получити сподобивыйся.
Радуйся, Божественнаго вознесения свидетелю.
Радуйся, светлых небожителей собеседниче.
Радуйся, великия благодатныя радости в день вознесения причастниче.
Радуйся, хвалы и прославления Господа светлый источниче.
Радуйся, святый славный и всехвальный Апостоле Варфоломее.

Кондак 5
Богоглаголивый Лука явственно всей вселенней повествует, яко собранным во Иерусалиме всем учеником Христовым, внезапу бысть шум с небесе, яко носиму дыханию бурну, и исполни весь дом, идеже ученицы Его бяху седяще, и явишася им разделени языцы, яко огненнии, седе же на едином коемждо их, и исполнишася вси Духа Свята, и начаша глаголати иными языки, якоже Дух даяше им провещавати. С прочими святыми Апостолы Христовыми в Сионстей горнице и ты был еси, блаженне Варфоломее, и дара языка сподобился еси получити, и с велиею радостию и крепким дерзновением, Духом Святым водимый, научился еси иными языки в Троице славимому Богу непрестанно взывати: Аллилуиа.

Икос 5
Увидел еси, святый Апостоле Варфоломее, в павшем ти жребии проповедати Христово Евангелие в Сирии, Асии и прочих соседних странах со Апостолом Филиппом вкупе, повеление Самаго Господа. Сего ради тягостных путей апостольских не убоялся еси, страданий за Господа Христа не устрашился еси и, купно с Филиппом, единаго Господа в сих странах проповедал еси; тогда и Лидийския и Мизийския грады и веси оглашени быша проповедию апостольскою. Дивящися сим благовестническим трудом твоим, сице радостно тебе глаголем:
Радуйся, неленостный исполнителю заветов Христовых.
Радуйся, безбоязненный проповедниче Христова Евангелия.
Радуйся, яко со Апостолом Филиппом и сестрою его Мариамною по градам и весям Асийским и Лидийским с благовестием шествовал еси.
Радуйся, яко со Апостолом Иоанном Богословом благодатными утешении наслаждался еси.
Радуйся, неустанный к Богу молитвенниче.
Радуйся, дара любве к Богу и людем усердный приумножителю.
Радуйся, покаяния учителю.
Радуйся, смирения наставниче.
Радуйся, идолов сокрушителю.
Радуйся, великих Таин Божиих провозвестниче.
Радуйся, огненными словесы своими слух языческих людей огласивый.
Радуйся, ко Христу детоводителю их прилежный.
Радуйся, святый славный и всехвальный Апостоле Варфоломее.

Кондак 6
Проповедницы учения Христова усерднейшии явишася святии Варфоломей, Филипп и блаженная Мариамна, егда со Христовым Евангелием внидоша во град фригийский Иераполь, иже бе исполнен мерзких идолов, ослепленнии же людие его боготвориша змии и ехидны. Первее святии Апостоли, со Иоанном Богословом вкупе, велию ехидну молитвою своею победиша и копием умертвиша; послежде же день и нощь ко славе Божией труждающеся, научиша многия воспевати купно с ними песнь хвалебную Господеви: Аллилуиа.

Икос 6
Возсия обильно свет учения Христова во граде Иераполе, егда святый Варфололей, с Филиппом и Мариамною вкупе, отверзоша очи некоему Стахию, четыредесят лет слепотствующему, жену Анфипата Иерапольскаго, змием угрызенную, от одра смертнаго воздвигоша, еще же и многи недужныя исцелиша и бесныя уврачеваша. Анфипат же злый, ярости исполнися, егда услыша, яко жена его веру Христову прият, повеле святых Апостолов лютым мукам предати. Мы же, воспоминая сия славныя страдания и подвиги во славу Христа, восхваляем святаго Апостола Варфоломея всеусердно:
Радуйся, Духа Святаго сосуде вседрагий.
Радуйся, велиих чудес совершителю.
Радуйся, слепым зрение даровавый.
Радуйся, хромым благошествие устроивый.
Радуйся, от укушения ядовитых змий целителю.
Радуйся, бесов прогонителю.
Радуйся, неустрашимый исповедниче всесладкаго имене Христова.
Радуйся, купно с Филиппом на смерть осужденный.
Радуйся, на стене идольскаго капища распятый.
Радуйся, силою Божиею невредим сохранивыйся.
Радуйся, чудесы своими многи ко Христу обративый.
Радуйся, Стахия во епископа Иерапольскаго поставивый.
Радуйся, святый славный и всехвальный Апостоле Варфоломее.

Кондак 7
Хотя вси концы вселенныя учением Христовым огласити, святый Варфоломей, от лютых гонений Анфипата Иерапольскаго избавленный, с проповедию Христовою, Духа Святаго повелением, прииде во Индийския страны, идеже во славу Христову нимало времени потрудися, шествуя из града во град, из веси в весь, благосвествуя мир Христов, исцеляя болезни неисцельныя и научая люди стран Индийских оставити идолы безстудныя, единому же Богу, благодеющему всем, взывати: Аллилуиа.

Икос 7
Дивное благопопечение о людех стран Индийских явил еси, святый Апостоле, егда насельники стран сих просветив и Церковь тамо устроив, Евангелие от святаго Матфея, с собою носимое, на язык их преложи, и самое то Евангелие, от Матфея написанное, у нихже остави. Сего ради просвещеннии тобою людие стран Индийских благодарно воспеваху ти, святый Варфоломее, тако:
Радуйся, великий наш Апостоле.
Радуйся, во Христе отец наш чадолюбивый.
Радуйся, муками рождения о нас болезновавый.
Радуйся, Христа Господа в нас вообразивый.
Радуйся, идольскую лесть обличивый.
Радуйся, ко истинному свету вся ны наставивый.
Радуйся, словеса Евангелия Христова нам оставивый.
Радуйся, Церкве Божия устроителю.
Радуйся, неустанный о нас пред Престолом Божиим предстоятелю.
Радуйся, о всем мире теплый пред Богом ходатаю.
Радуйся, крепкое наше упование.
Радуйся, о нашем спасении изрядный попечителю.
Радуйся, святый славный и всехвальный Апостоле Варфоломее.

Кондак 8
Странно есть неверующим слышати, како святый Апостол Варфоломей, светом истины Христовы осиявый страны Индийския, паки новую ниву, Христовым учением невозделанную, обрете, и на конец жития своего в Великую Армению устремися, да просветит и зде люди, во тьме и сени смертней седящия, и да научит их единому Творцу и Господу благодарными усты воспевати: Аллилуиа.

Икос 8
Весь духом горя о славе Господней, прииде святый Апостол Варфоломей в Великую Армению и усердно воззва в молитве своей ко Господу, да посрамлени будут беси, во идолех страны тоя обитавшия, и да будут ниспровергнуты бездушнии идоли; и не тща бе молитва святаго Апостола: беси умолкоша, идоли падоша, людие же сего бесовскаго мучительства и безумия избавльшеся, восхваляху святаго просветителя своего сицевыми радостными воззвании:
Радуйся, Апостоле, красными ногами своими землю нашу освятивый.
Радуйся, святую истинную веру всем нам возвестивый.
Радуйся, бесов изгонителю.
Радуйся, идолов сокрушителю.
Радуйся, в молитве и дерзновении пламенеющий.
Радуйся, во святем служении Господу добрый пример нам показующий.
Радуйся, дивный Христов благовестниче.
Радуйся, преславный чудотворче.
Радуйся, болезни наша врачующий.
Радуйся, скорби наша разгоняющий.
Радуйся, всех нас истинно возлюбивый.
Радуйся, всем нам путь ко спасению показавый.
Радуйся, святый славный и всехвальный Апостоле Варфоломее.

Кондак 9
Вси людие Великия Армении зело удивляхуся, зряще чудеса и знамения тобою, святый Апостоле, совершаемая; егда же видеша идолы падшия, духи нечистыя изгонимыя, славляху Бога, дивнаго во святых Своих, и воспеваху Ему благодарными усты: Аллилуиа.

Икос 9
Витийствующий язык человеческий не возможет достойно восхвалити болезни и труды твоя, знамения и чудеса, святый Апостоле, в Велицей Армении бывшая; сила же знамений сих даже до царева дому достиже, егда из дщере царевой молитвою твоею бес изгнася. Егда же царь и вси людие твою во Христе нелицемерную нищету узревше, обратишася ко Христу, тогда вся Великая Армения от царева дому и до обиталища бедных огласися сицевыми радостными и хвалебными пении тебе, великому Апостолу и чудотворцу:
Радуйся, чудотворче предивный.
Радуйся, всех болящих врачу безмездный.
Радуйся, славу Христову паче земных сокровищ возлюбивый.
Радуйся, о спасении душ человеческих прилежавый.
Радуйся, царя Полимия, царицу и дщерь их ко Христу обративый.
Радуйся, и царедворцы знатныя, и от простых людей нимало святым Крещением просветивый.
Радуйся, нищету духовную и телесную возлюбивый.
Радуйся, славный безсребрениче.
Радуйся, Великия Армении просветителю.
Радуйся, отче наш чадолюбивый.
Радуйся, райския двери нам отверзающий.
Радуйся, от пути погибельнаго нас исхищающий.
Радуйся, святый славный и всехвальный Апостоле Варфоломее.

Кондак 10
Спасению новых и новых людей работая, достигл еси, святый Апостоле Варфоломее, блаженнаго конца жития своего: жрецы бо идольстии в Велицей Армении видяще, яко препитания своего лишахуся, научиша царева брата, лютаго Астиага, да погубит тя, святый Апостоле. Сей же, неистовый, предав тебе во граде Альбане многим мукам, повеле на кресте стремглав распяти тя, да престанут уста твоя вещати учение Христа распятаго; ты же, Апостоле, и на кресте радостно взывал еси Господеви: Аллилуиа.

Икос 10
Царя и Господа не престал еси проповедати, святый Апостоле, усты своими и вися стремглав на кресте: учил бо еси собранныя на позор сей люди твердо за веру Христову стояти, согласно заповедем Евангельским жити и неверныя ко Христу привлекати. Мы же, дивящеся укрепляющей тя силе Божией и твоему, святый Апостоле, мужеству, в похвалу тебе сице глаголем:
Радуйся, славный Христов мучениче.
Радуйся, Христова учения исповедниче дерзновенный.
Радуйся, устами своими даже до смерти истину Божию проповедавый.
Радуйся, терпением своим всю вселенную удививый.
Радуйся, в смертный час твой тысящи людей ко Христу привлекий.
Радуйся, явный благодатныя силы Христовы свидетелю.
Радуйся, позор крестныя смерти, яко победный венец, радостно понесший.
Радуйся, в час смертных мучений своих с Господем в единении пребывый.
Радуйся, в смертном часе райския сладости на земли предвкусивый.
Радуйся, в сей райстей сладости Божественнаго естества истинный причастниче.
Радуйся, терпения усердный учителю.
Радуйся, всяких добродетелей вместилище.
Радуйся, святый славный и всехвальный Апостоле Варфоломее.

Кондак 11
Пение всеумиленное приносим тебе, славный Апостоле Христов Варфоломее, смертный твой час на древе крестнем воспоминающе, дивимся твоему священному за Христа заколению, со слезами ублажаем твою кончину, егда мучитель лютый повеле и кожу с твоего честнаго тела содрати; ты же, святый Апостоле, не престал еси Господа восхваляти до того блаженнаго часа, егда с кожею твоею глава твоя, велением мучителя, усечена бысть, чистая же душа твоя, святый Апостоле, восхищена бысть на небеса воздавати славу Господеви и со светлыми небожители во веки взывати Ему: Аллилуиа.

Икос 11
Свет велий во исцеление немощей человеческих возсия от честных мощей твоих, славный Апостоле, во граде Альбане, егда вернии, вземше по кончине твоей со креста честное тело твое, во оловянней раце благоговейно, вкупе с главою и кожею, положиша. Егда же невернии бесов служителие узреша, яко мнози в той стране от неверных ко Христовой Церкви прилагахуся, ввергоша в море честныя мощи твоя: тии же во оловянней раце, аки в легцей ладии, по водам понесошася, дондеже пристаху ко острову Липару, идеже епископ Агафон, по Божию откровению, с народом и клиром с радостию сия прият и во храме благоговейно постави, воспевая тебе сице:
Радуйся, славный Апостоле Христов.
Радуйся, верный самовидче Бога Слова и слуго Его.
Радуйся, мудрый Евангелия Христова проповедниче.
Радуйся, чудес неистощимый источниче.
Радуйся, яко мощи твоя от востока и до запада имя Господне восхвалиша.
Радуйся, яко шествием мощей твоих море освятися.
Радуйся, Сирии и Асии просветителю.
Радуйся, Иераполя фригийскаго Апостоле.
Радуйся, яко с проповедию Христовою даже до Индии дошел еси.
Радуйся, яко насельников брегов моря Хвалынскаго светом Христова учения просветил еси.
Радуйся, яко Великую Армению ко Христу привел еси.
Радуйся, яко и нас пришествием мощей твоих сладостно утешил еси.
Радуйся, святый славный и всехвальный Апостоле Варфоломее.

Кондак 12
Благодать от Господа достойно подражати житию твоему и прославляти болезни и труды твоя, подаждь нам, святый Апостоле, якоже иногда Иосифу Песнописцу, егда в навечерие праздника твоего явился еси ему во олтари и святым Евангелием благословил еси его, да и мы молитвами твоими, благодатию Божиею озареннии, купно со всею вселенною Господеви со умилением взываем: Аллилуиа.

Икос 12
Поюще твое за Христом последование, восхваляем дивная апостольския труды твоя, благоговейно чтим двукратное твое за Христа распятие, ублажаем честныя твоея главы отсечение, славим неисчетная чудеса от честных мощей твоих и в похвалу велегласно тебе глаголем:
Радуйся, проповедию твоею многи концы вселенныя огласивый.
Радуйся, многия люди ко Христу приведый.
Радуйся, мудрый Евангелия Христова проповедниче.
Радуйся, Христовых заповедей твердый исполнителю.
Радуйся, яко жителие острова Липара и града Беневента, идеже мощи твоя почивают, яко своего Апостола тя почитают.
Радуйся, яко подвигам твоим вся вселенная дивится.
Радуйся, во Христе отец наш многопопечительный.
Радуйся, Апостоле, о нашем спасении зело рачительный.
Радуйся, яко в день Страшнаго Суда Христова возсядиши на единем от обоюнадесяте престолов, да судиши со Христом всю вселенную.
Радуйся, яко за праведников ходатаем пред единым Судиею и Господем в той час явишися.
Радуйся, славных дел Божиих возвестителю.
Радуйся, злых козней сатанинских сокрушителю.
Радуйся, святый славный и всехвальный Апостоле Варфоломее.

Кондак 13
О святый славный и всехвальный Апостоле Варфоломее! Приими сие от нас, недостойных, приносимое тебе хвалебное пение, и якоже ты сам всем сердцем, душею и телом предал еси себе на служение Господеви своему и Учителю, тако и нас, молитвами твоими, сподоби жизнь свою во славу Господню устрояти, вся от Него посылаемая со благодарением приимати, и тако тебе подражающе, вечное Царствие наследовати и Господеви, Творцу нашему и Промыслителю, с тобою и всеми святыми во веки воспевати: Аллилуиа.
(Этот кондак читается трижды, затем икос 1 и кондак 1).

Молитва
О преславный Апостоле Христов Варфоломее, душу за Христа предавший и кровию твоею пажить Его удобривший! Услыши чад твоих молитвы и воздыхания, сердцем сокрушенным ныне приносимыя. Се бо беззаконьми омрачихомся, и того ради бедами, якоже тучами, обложихомся, елея же добраго жития обнищахом зело, и не возможем противитися волком хищным, иже расхищати наследие Божие дерзостно тщатся. О, сильный! Понеси немощи наша, не отлучайся духом от нас, да не разлучимся в конец от любве Божия, но крепким заступлением твоим нас защити, да помилует Господь всех нас молитв твоих ради, да истребит же рукописание безмерных грехов наших, и да сподобит со всеми Святыми блаженнаго Царствия и брака Агнца Своего, Емуже честь и слава, и благодарение и поклонение во веки веков. Аминь.

Канон святому апостолу Варфоломею (на пренесение мощей)
глас 4


Пе́снь 1.
Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Прече́стна ка́меня тя́ живота́ Ка́мень показа́, на не́мже созда́ Це́рковь Свою́, Варфоломе́е, апо́столе Госпо́день. Те́мже тя́ чти́м и ублажа́ем.
Вели́ким научи́лся еси́, су́щим па́че ума́ и смы́сла, Прему́дрость обре́т ипоста́сную, объюро́дил еси́ е́ллинов му́дрость, умудри́в концы́ Боже́ственными уче́нии.
Мертве́ц погребе́нный, мо́ря ше́ственник бы́л еси́, Боже́ственным повеле́нием повину́яся, и, я́ко со́лнце к за́паду, от восто́ка, апо́столе, приспе́л еси́, просвеща́я его́.
Богоро́дичен: По́лный истощава́ется, Преве́чный начина́ется, от Де́вы Богоотрокови́цы ражда́емь, Его́же пропове́дал еси́ во двою́ существу́, во еди́ной же ипоста́си, богоблаже́нне.

Пе́снь 3.
Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.
Кре́пко утеше́ние тя́ обрето́ша, и све́т, и лю́тых избавле́ние, Варфоломе́е прему́дре, и́же пре́лестию содержи́мии и безбо́жия мра́ком умовре́дно обложе́ннии.
Уста́ бы́л еси́ Бо́га Сло́ва, от у́ст во́лка лука́ваго лю́ди изба́вил еси́, сла́вне, приводя́ к Зижди́телю твоему́ ба́нею креще́ния, Варфоломе́е апо́столе.
Язы́ком твои́м о́гненным попали́в пре́лести ве́щь го́рькую, олядене́вшая, прему́дре, сердца́ обнови́л еси́ и де́лати небе́сныя ра́зумы устро́ил еси́.
Богоро́дичен: Из Тебе́ па́че сло́ва Бо́г Сло́во роди́тися благоизво́ли пло́тию, Девома́ти Чи́стая, ученика́ избра́в и служи́теля при́снаго, Варфоломе́я сла́внаго.

Седа́лен, гла́с 3.
Бога́тство некра́домо Це́ркви, сто́лп непоколеби́мь благоче́стия, Варфоломе́е, показа́лся еси́, апо́столе, в мо́ри же стезю́ творя́, пучи́ну боже́ственных источа́еши исцеле́ний, достосла́вне. Христа́ Бо́га моли́ дарова́ти на́м ве́лию ми́лость.
Богоро́дичен: Я́ко Всенепоро́чная Неве́сто Творцу́, я́ко неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.
Крестобогоро́дичен: А́гнца и Па́стыря и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.
Ирмо́с: Неизсле́дный Бо́жий сове́т, е́же от Де́вы, воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.
Рече́ния коне́ц прия́ша проро́ческая: све́т бо язы́ком в снабде́ние, богогла́сный по́йде учени́к, просвеща́я вся́ вселе́нныя концы́.
Заре́ю просвеща́емь богонача́льною, Боже́ственным прича́стием, вторы́й све́т яви́лся еси́, служи́в перводе́тельно на́с ра́ди Обнища́вшему пло́тию, сла́вне.
Изба́ви твое́ ста́до грехо́вныя бу́ри, и бе́д, и скорбе́й сопроти́вных, наставля́я на́с при́сно ко приста́нищем, сла́вне, спаси́тельным благода́тию.
Богоро́дичен: Я́ко несказа́нное премно́гое бога́тство милосе́рдия ро́ждши несказа́нно, обнища́вшия ны́ грехо́м, Пречи́стая, Боже́ственными дарова́нии обогати́.

Пе́снь 5.
Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Но́ги стяжа́в красны́ пропове́данием, все́м блага́я благовести́л еси́, все́м ми́р, блаже́нне, пропове́дал еси́, вражды́ дре́вния отчужди́в Боже́ственными уче́нии Спа́са, апо́столе.
Сло́во твое́ цельба́ бы́сть прие́мшим зми́я я́д смертоно́сный, Варфоломе́е, земля́ же паде́ся нечести́вых проро́чески, веща́нием прему́дрых уче́ний твои́х.
Мертве́ц многодне́вный, жи́знь источа́я незави́стную, хребты́ носи́мь морски́ми, Варфоломе́е, с боже́ственными му́ченики, безме́рныя пучи́ны проше́д, во о́стров Липа́рский устреми́лся еси́, апо́столе.
Богоро́дичен: И́стинно сла́влю Тя́, Бо́жию Ма́терь Пречи́стую, ра́дуйся, Тебе́ зову́, я́ко а́нгел, Благослове́нная Обра́дованная, слы́шание и глаго́лание стра́шно, стра́нно прия́телище Влады́це тва́ри.

Пе́снь 6.
Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Заря́ со́лнца, возсия́вшаго ми́ру, пло́тию бы́л еси́, светоно́сными твои́ми уче́нии, апо́столе, отгоня́я но́щь ле́сти многобо́жную.
Лю́дем Бо́жие спасе́ние уясни́л еси́, пло́ти подо́бием я́вльшагося за мно́гую бла́гость, Варфоломе́е, пропове́дниче язы́ков и апо́столе.
Пу́ть мо́ря име́л еси́ и стези́ в вода́х сотвори́л еси́, и позна́шася твоя́ в си́х стопы́ Ду́хом, я́коже Дави́д прорече́, блаже́нне апо́столе.
Богоро́дичен: Хра́м сла́вы была́ еси́ и две́рь Све́та яви́лася еси́, гора́ присе́нная, зна́меньми проро́ческими пева́ема, Де́во Ма́ти Богора́дованная.

Конда́к, гла́с 4.
Яви́лся еси́ ве́лие со́лнце Це́ркви, уче́ний сия́нием и чудесы́ стра́шными просвеща́я пою́щия тя́, Варфоломе́е, Госпо́день апо́столе.

И́кос:
Я́коже со́лнце многосве́тлое, проше́д ми́р и се́й луча́ми слове́с твои́х просве́щь, заше́л еси́, у́мер му́ченически, и исходя́щими от гро́ба твоего́ сия́нии тму́ страсте́й отгна́л еси́. Те́мже тя́ и́же за́вистию одержи́мии, и к за́падом со́лнца отгна́вше, страстоно́сче, отпуща́ют, по мо́рю ходя́ща. Узре́жеся в тебе́ превели́ко чу́до, от пла́вающаго стра́шно глубины́ мо́ря, е́же чу́дными освяти́ся твои́ми ше́ствовании, Варфоломе́е, Госпо́день апо́столе.

Пе́снь 7.
Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.
Объюроде́вшее зло́бою, пресла́вне, челове́чество, сла́дкою со́лию исцели́л еси́ слове́с твои́х и пе́ти уве́рил еси́: препе́тый отце́в Госпо́дь и Бо́г, благослове́н еси́.
Я́ко не́бо превысо́ко, бы́в, сла́ву Бо́жию мы́сленно высо́ким гла́сом пропове́дуеши, я́ко боже́ственный апо́стол, Ему́же зове́м: препе́тый отце́в Госпо́дь и Бо́г, благослове́н еси́.
Изтка́в Боже́ственныя благода́ти ри́зу, блаже́нне, оде́ял еси́ обнаже́нныя лю́те зло́бою зми́я и пе́ти уве́рил еси́: препе́тый отце́в Госпо́дь и Бо́г, благослове́н еси́.
Богоро́дичен: Предста́тельницу Тя́ и сте́ну необори́мую обогати́вшеся, Богороди́тельнице Чи́стая, раби́ Твои́, всегда́ ве́рою вопие́м Ти́: ра́дуйся, мо́сте, к Бо́гу преводя́й от земли́, Благослове́нная.

Пе́снь 8.
Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Струя́ми наводня́емь боже́ственными, я́коже из Еде́ма река́, изше́л еси́ напои́ти подсо́лнечную уче́нии твои́ми и преле́стныя во́ды изсуша́я благода́тию, — Го́спода по́йте, — зовы́й, — и превозноси́те Его́ во ве́ки.
Сло́во, я́ко боже́ственна богосло́ва слове́с вы́шших научи́в тя́, я́коже стрелу́ небе́сную, ми́ру посла́, уязвля́я собо́ры вра́жия, сла́вне, и спаса́я ве́рою пою́щия и превознося́щия Его́ во ве́ки.
Иска́пая, я́коже гора́, яви́лся еси́, Боже́ственную сла́дость, достохва́льне, мо́ре же име́л еси́ стезю́ по сме́рти, Боже́ственными си́лами пла́вая, сего́ непотопля́емь пучи́ною, тя́ доринося́щим, до́блий страда́льче.
Богоро́дичен: Зако́нов естества́ утаи́вшися, и ражда́еши и пребыва́еши Присноде́ва: Сло́во бо родила́ еси́, Челове́ка бы́вша за премно́гую бла́гость, Ему́же вси́ зове́м: Го́спода по́йте, дела́, и превозноси́те Его́ во ве́ки.

Пе́снь 9.
Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Приво́дит пра́здник па́мяти твоея́ дне́сь апо́стольский ли́к, му́ченицы ра́дуются и пра́ведных все́х чи́нове. Ве́рнии же, пе́сньми тя́ почита́ем и вопие́м: от вся́кия на́с печа́ли, учениче́ Христо́в, изба́ви.
Кресто́м блаже́нную кончи́ну, сла́вне, прие́м, сообра́зен бы́л еси́ страсте́м Учи́теля твоего́ и прича́стник све́тлости и Боже́ственныя сла́вы, при́сно со а́нгелы Тому́ предстоя́ и неизрече́ннаго све́та сподобля́емь.
Пресве́тлая и благонаро́читая па́мять твоя́ на́м возсия́, все́х просвеща́ющи, Христо́в самови́дче, Варфоломе́е му́дре, в не́йже мо́лим тя́: помяни́ все́х на́с, супротивле́ния вся́каго и обстоя́ния моли́твами твои́ми на́с избавля́я.
Богоро́дичен: Умертви́ на́ша плотска́я мудрова́ния, Богороди́тельнице Чи́стая, уста́ви страсте́й на́ших бу́рю, ути́ши смуще́ние и помышле́ньми утверди́ боже́ственными, Чи́стая, сердца́ ве́рою чту́щих Тя́, Предста́тельнице на́ша непосты́дная.

Свети́лен.
Све́та прия́телища, непреме́нныя зари́ невече́рняго дне́, светолу́чныя мо́лнии, Варфоломе́я и Ти́та, ве́рнии, сла́вим вси́.
Богоро́дичен: Кре́пким Твои́м покро́вом от наве́та вра́жия на́с, Чи́стая, Твоя́ рабы́, сохрани́ вся́ невре́дны: Тя́ бо и́мамы еди́ну прибе́жище в напа́стех.

 
Комментарии
Всего комментариев: 1
2018/09/07, 11:16:55
Слава Тебе Боже.
андрей
Добавить комментарий:
Имя:
* Сообщение [ T ]:
 
   * Перепишите цифры с картинки
 
Подписка на новости и обновления
* Ваше имя:
* Ваш email:
Просьба о помощи
© Vinchi Group
1998-2018


Оформление и
программирование
Ильи
Бог Есть Любовь и только Любовь

Страница сформирована за 0.086387872695923 сек.