Кондак 1
Взбранной Воеводе, Владычице нашей Богородице, похвальная пения приносим Ти раби Твои о явлении чудотворныя иконы Твоея. Ты же, яко имущая милосердие неизреченное, соблюди и спаси от всяких бед рабы Твоя, с верою и любовию вопиющия Ти: Радуйся, Богородице Дево Млекопитательнице, милостию Твоею нас присно питающая.
Икос 1
Архангел Гавриил с небесе прииде к Тебе, Богородице, благовестити непостижимое рождение от Тебе Бога Слова, и рече: радуйся, Благодатная, Господь с Тобою. Темже и мы, смиреннии, дерзаем вопити к Тебе сице:
Радуйся, Ангелов радосте;
Радуйся, человеков спасение.
Радуйся, падшаго мира обновление;
Радуйся, средостения вражды разрушение.
Радуйся, пророческих глагол исполнение;
Радуйся, завета древняго пременение.
Радуйся, Агнца и Пастыря во чреве Твоем упасшая;
Радуйся, Творца небесе и земли плотию рождшая.
Радуйся, повившая Повивающаго небо облаки;
Радуйся, дланьма носящая на Херувимех Носимаго.
Радуйся, Питателя вселенныя млекопитавшая;
Радуйся, млеком Богопознания верных Питательнице.
Радуйся, Богородице Дево Млекопитательнице, милостию Твоею нас присно питающая.
Кондак 2
Видя Иосиф целомудренный Чистую Деву непраздну сущу, восхоте тай пустити Ю: уведев же во чреве имущу от Духа Свята, удивися непостижимей тайне воплощения, и до конца верен хранитель чистоты Твоея пребысть; мы же, грешнии, славяще еже о нас Господне смотрение, во умилении сердец наших благоговейно покланяемся Ти, вопия рождшемуся от Тебе Богу: Аллилуиа.
Икос 2
Разум человеческий недоразумевает постигнути велие таинство воплощения от Тебе, Пречистая, Христа Бога нашего, и Ангели небеснии недоуменно дивятся, како нас ради, человек, Владыки Христа с небесе на землю низхождение и от Девы воплощение бысть, мы же, земнороднии, Тебе благодарение приносяще, радостно глаголем:
Радуйся, праведных Иоакима и Анны святое прозябение;
Радуйся, неплодныя утробы плод благословенный.
Радуйся, в зачатии Твоем чудеснем прославленная;
Радуйся, в рождении Твоем благодатию Божиею осененная.
Радуйся, благовещение Архангелово во смирении радостно приемшая;
Радуйся, девство и деторождение пречудно в Себе сочетавшая.
Радуйся, Спасителя мира нетленно родившая;
Радуйся, Дево Пренепорочная и Богородице Пречистая.
Радуйся, Бога яко Отроча младо пастырем явившая;
Радуйся, Владыку, яко Первенца, праведному Симеону принесшая.
Радуйся, Кивоте Божества освященный;
Радуйся, Вместилище Божественных откровений.
Радуйся, Богородице Дево Млекопитательнице, милостию Твоею нас присно питающая.
Кондак 3
Сила Вышняго осени Тя, Марие Богоневестная, и Дух Святый найде на Тя с благовещением Архангеловым. Темже благодатию Святаго Духа осеняема, зачала еси во утробе Твоей и явилася еси одушевленный Кивот Слова воплощеннаго, Емуже прерадостно вопием: Аллилуиа.
Икос 3
Имущи любовь к человеком, искупленным Кровию Сына Твоего, Преблагая Владычице, прияла еси от Бога благодать покрывати род христианский, емуже в утешение икону Твою сию святую, чудес благодатию прославленную, милостиво даровала еси. Темже благодарственно вопием Ти:
Радуйся, пресветлая звездо, являющая миру Солнце правды;
Радуйся, преславная палато, в нюже вселися Христос.
Радуйся, от всех родов ублажаемая;
Радуйся, велие дерзновение к Сыну Твоему и Богу стяжавшая.
Радуйся, выну ходатайствующая пред Ним за род христианский;
Радуйся, присно умоляющая Его за люди согрешившия.
Радуйся, скорая наша Помощнице;
Радуйся, милостивая наша Заступнице.
Радуйся, грешников кающихся Споручнице;
Радуйся, сущих в скорбех и напастех Избавительнице.
Радуйся, твердое наше ограждение от находящих на ны озлоблений;
Радуйся, непостыдная наша надеждо.
Радуйся, Богородице Дево Млекопитательнице, милостию Твоею нас присно питающая.
Кондак 4
Бурное море преплыв, Савва Святый, Сербския Церкве первосвятитель, по завету великаго Саввы Освященнаго, благоговейно прият чудотворную икону Твою, Млекопитательнице, от рук преподобных отец Великия Лавры его и радостно возопи к Носимому на руках Твоих Сыну Божию: Аллилуиа.
Икос 4
Слышавше иноцы Святыя Горы, яко честная икона Твоя, Богородице, от Иерусалима к ним грядет, с радостию изыдоша в сретение ея, и узревше ю, руками святителя Саввы носимую, благоговейно поклонишася и с веселием сице Тебе вопияху:
Радуйся, являющая нам дивное заступление;
Радуйся, сладчайшее душ наших утешение.
Радуйся, Гору Афонскую благодатным Покровом осенившая;
Радуйся, иконы Твоя чудотворныя в ней умножившая.
Радуйся, от Иерусалима пришествием Твоим новое знамение милости Твоея нам явившая;
Радуйся, иконою Твоею насельников Святыя Горы благодатно озарившая.
Радуйся, странствия нашего тихое прибежище;
Радуйся, спасения нашего немолчная Ходатаице.
Радуйся, монахов премудрая Учительнице;
Радуйся, Святаго Афона Богодарованная Владычице.
Радуйся, затворников и отшельников сладкая Собеседнице;
Радуйся, иноков Прокровительнице.
Радуйся, Богородице Дево Млекопитательнице, милостию Твоею нас присно питающая.
Кондак 5
Боготечною звездою водимии волсви достигоша храмины, в нейже узреша Отроча с Мариею, Материю Его, и падше поклонишася Ему. Сего ради и мы, грешнии, предстояще честней иконе Твоей, Богомати, яко Самой Ти сущей и держащей на объятиих Твоих Богомладенца, со умилением поклоняемся Ему, непрестанно вопиюще: Аллилуиа.
Икос 5
Видяще, Владычице, святую икону Твою с Богомладенцем Иисусом, Егоже, яко блаженная Мати, от сосцу Твоею питаеши, величаем дивное смотрение Его о нас, грешных, и умиленно вопием Ти таковая:
Радуйся, Подательнице духовныя радости;
Радуйся, Агнице, рождшая Агнца Божия, вземлющаго грехи мира.
Радуйся, лествице Иаковля, земная с небесными соединившая;
Радуйся, в след Тебе девы Царю приводящая.
Радуйся, скорбных матерей утешение;
Радуйся, чад их благодатное охранение.
Радуйся, вдов скорая Заступнице;
Радуйся, сирых Питательнице.
Радуйся, алчущих Кормительнице;
Радуйся, болящих нечаемая Целительнице.
Радуйся, заблуждших Путеводительнице;
Радуйся, юных целомудрию Наставнице.
Радуйся, Богородице Дево Млекопитательнице, милостию Твоею нас присно питающая.
Проповедуем милости, явленныя Тобою Святей Афонстей Горе, Богомати, и о Покрове Твоем всечестнем присно радуемся, видим бо, яко и ныне от иконы Твоея исцелений множество бывает всем верою просящим и умиленно вопиющим Богу: Аллилуиа.
Икос 6
Возсияла еси лучами предивных чудес Твоих, Богородице Дево, от иконы Твоея святыя, на нейже девственную лепоту Твою созерцающе, и рукама Твоима держимаго Краснейшаго паче сынов человеческих Богомладенца видяще, к славословию Твоему подвизаемся и тако глаголем:
Радуйся, цвете девства неувядаемый;
Радуйся, матерей славо и похвало.
Радуйся, Мироположнице благоухания Христова;
Радуйся, алавастре, на всяк недуг врачевания подающий.
Радуйся, Предстательнице у Престола Пресвятыя и Единосущныя Троицы;
Радуйся, стамно златая святых святейшаго Слова.
Радуйся, преукрашенный чертог Царя царей;
Радуйся, Горо Святая, н низхождением Божиим прославленная.
Радуйся, Церкве Христовы сияющая лепота;
Радуйся, всего мира удобрение.
Радуйся, Небесная Царице, паче солнца светлейшая;
Радуйся, Владычице, от всех чинов Ангельских поклоняемая.
Радуйся, Богородице Дево Млекопитательнице, милостию Твоею нас присно питающая.
Кондак 7
Хотящим нам, Богородительнице, благоговейно лобызати чудотворный Твой образ, не возбрани, Всеблагая, грехов ради наших, но, аще и недостойных, с любовию приими и вся прошения благая наша исполни; вемы бо, Царице, яко милосердие Твое неисчетно. Сего ради с упованием неотступным к Тебе прибегаем и, славяще чудеса Твоя, поем Богу: Аллилуиа.
Икос 7
Новую милость явила еси, Богородице, егда неисчерпаемый источник исцелений и благодатную помощь всем с верою притекающим ко святей сей иконе Твоей даровала еси. Сего ради, благодаряще Тя и пречудному образу Твоему со умилением припадающе, хвалебно зовем Ти:
Радуйся, от горних высот всех нас Матернею любовию Твоею назирающая;
Радуйся, юдоль земную многоскорбную милосердием Твоим посещающая.
Радуйся, непрестанная спасения нашего Споспешнице;
Радуйся, дивный сосуд благодатнаго врачевания.
Радуйся, прославляющих Тя прославляющая;
Радуйся, и непочитающих иконы Твоея на покаяние призывающая.
Радуйся, во дни брани православным воином крепость подающая;
Радуйся, в дни мира сердца верных веселящая.
Радуйся, нагих и безкровных присно покрывающая;
Радуйся, сирот и вдовиц никогдаже оставляющая.
Радуйся, хождение хромым подающая;
Радуйся, очи слепым отверзающая.
Радуйся, Богородице Дево Млекопитательнице, милостию Твоею нас присно питающая.
Кондак 8
Странствие наше земное многоскорбное и многомятежное услаждаеши, Владычице, иконою Твоею святою, на нюже взирающе с верою и любовию, уповаем, яко имамы Тя на небеси Матерь и Покровительницу Всеблагую, присно споспешествующую нам в жизни сей и по смерти нас не оставляющую. О сем радующеся и из глубины сердца благодаряще Тя, вопием Богу: Аллилуиа.
Икос 8
Вси роди христианстии присно блажат Тя, Богородицу сущую, и на лик Твой Пречистый благоговейно взирающи, с верою покланяются Тебе, яко Честнейшей Херувим и Славнейшей без сравнения Серафим. Темже и мы, грешнии, с любовию вопием Ти:
Радуйся, Царице, яко Преславная глаголашася о Тебе;
Радуйся, Владычице, яко небесная и земная пети Тебе не умолкают.
Радуйся, свеще неугасимая, весь мир сиянием Твоим озаряющая;
Радуйся, благоуханный крине девства и чистоты.
Радуйся, любве и милости источниче живоносный;
Радуйся, молитвеннице благоприятная за ны грешныя ко Христу Богу.
Радуйся, грешных ко Творцу приводящая;
Радуйся, праведный гнев Его на милость прелагающая.
Радуйся, ниво неоранная, клас спасительный миру израстившая;
Радуйся, Трапезо Пресвятая, Живоносный Хлеб нам даровавшая.
Радуйся, лествице, от тьмы греховныя ко спасению изводящая;
Радуйся, звездо Пресветлая, путь к небесем показующая.
Радуйся, Богородице Дево Млекопитательнице, милостию Твоею нас присно питающая.
Кондак 9
Всякая похвала не довлеет славе Твоей, Богородице Дево: Ты бо Сына от Духа Святаго зачала еси и невместимаго Бога во чреве вместила еси; Тобою спасение мира возвещается, падший же род человечь Пречестным Рождеством Твоим от вечныя смерти свобождается. Сего ради, из глубины души возсылаем Ти благодарственныя хваления и, яко избавленнии от злых, поем Богу: Аллилуиа.
Икос 9
Ветии многовещанныя не могут постигнути велию тайну Твоего приснодевства, Богородице, како в рождестве и по рождестве Дева пребыла еси. Мы же, верою православно величающе Тя, яко Приснодеву и Матерь Предвечнаго Живота, приносим Ти из глубины сердец исповедание наше и любовию вопием Ти:
Радуйся, иноков и инокинь православных благое наставление;
Радуйся, ревнующих о чистоте и целомудрии твердое ограждение.
Радуйся, девственных чинов Святая Предводительнице;
Радуйся, и брака честнаго защита и покрове.
Радуйся, Едина непорочная в женах;
Радуйся, нетленная и неискусобрачная Агнца и Пастыря Мати.
Радуйся, в ложеснах Твоих Бога нетесно вместившая;
Радуйся, Матерним Твоим к Нему дерзновением спасение миру устрояющая.
Радуйся, яко о Тебе радуется Ангельский Собор;
Радуйся, яко о Тебе торжествует человеческий род.
Радуйся, всеми добродетельми преукрашенная;
Радуйся, от всех христианских родов почитаемая и блажимая.
Радуйся, Богородице Дево Млекопитательнице, милостию Твоею нас присно питающая.
Кондак 10
Спасти хотя мир, Христос Бог избра Тя, Пречистая, и из честных кровей Твоих истка Себе Плоть, явися на земли и спасение миру содела. Темже песнословим Тя, яко Всепетую Матерь Избавителя, благодарственно вопиюще Ему: Аллилуиа.
Икос 10
Стену необориму и покров нерушимь имеют Тя, Богородице Дево, во иноческих обетех подвизающиися и Помощницу Державну вси, на Тя по Бозе все упование свое возлагающии, Тебе бо дадеся от Господа благодать молитвеннаго заступления, и Ты еси верных в девстве и чистоте утверждение. Темже и мы, грешнии, благоотишие душевное в Тебе обретающе, усердно взываем:
Радуйся, добре подвизающихся Ходатаице блаженнаго упокоения;
Радуйся, иноком, на плоть воинствующим, Подательнице блаженнаго упокоения.
Радуйся, безмолвствующим благодатное осенение;
Радуйся, старцев благоговейных отрадо и утешение.
Радуйся, стариц боголюбивых крепосте и утверждение;
Радуйся, юношей и дев в девственном житий заступление.
Радуйся, всяк возраст верных Матерняго благопопечения Твоего сподобляющая;
Радуйся, неверных в веру чудесы Твоими приводящая.
Радуйся, благочестивых домов покрове и благословение;
Радуйся, обидимых и гонимых готовое заступление.
Радуйся, обидящих грозное обличение;
Радуйся, враждующих любвеобильное примирение.
Радуйся, Богородице Дево Млекопитательнице, милостию Твоею нас присно питающая.
Кондак 11
Пение хвалебное приносим Ти, Христе Царю, в вертепе рождшемуся и во яслех возлегшему спасения нашего ради. Темже в песнех величаем и Пречистую Матерь Твою, Приснодеву Марию, пред честною иконою Ея возвещающе милости и чудеса, имиже обогатися вся вселенная. Ты же, Всеблагая, Сама научи нас выну взывати Богу: Аллилуиа.
Икос 11
Светлыми лучами чудес Твоих, Богородице Дево, мрак греховный отгоняеши, всех нас на стезю спасения поставляющи. Темже молим Тя, Всеблагая, приведи нас к тихому пристанищу Твоему, да со умилением приносим Ти хвалебныя пения сицевая:
Радуйся, Пренепорочная Владычице, Солнце Правды верным возсиявшая;
Радуйся, плачущим и скорбящим небесное утешение низпосылающая.
Радуйся, нищих и убогих богатство неоснудеваемое;
Радуйся, подвижников благочестия во брани духовней твердое укрепление.
Радуйся, предстательство к Богу наше крепкое;
Радуйся, в час кончины ограждение наше необоримое.
Радуйся, в райских селениих ходатайством Твоим нас водворяющая;
Радуйся, благочестно живущим Матернее милосердие являющая.
Радуйся, от востока до запада непрестанно славимая;
Радуйся, от Ангел и человек в песнех радостно превозносимая.
Радуйся, рук наших дела исправляющая;
Радуйся, скорби лютыя в радость претворяющая.
Радуйся, Богородице Дево Млекопитательнице, милостию Твоею нас присно питающая.
Кондак 12
Благодать и милость испроси, Преблагословенная Мати, от Сына Твоего, Христа Бога нашего, и, воздевающи к Нему Богоприемныя руце Твой, умоли Его вся ны спасти и избавити от гибели вечныя: много бо может молитва Твоя Матерняя ко благосердию Владыки; темже радующеся, поем рождшемуся из Тебе: Аллилуиа.
Икос 12
Поюще Преславная чудеса Твоя, Богородице Дево, от иконы Твоея святыя присно являемыя, величаем Тя, возвеличившую род наш. Ты же, Всеблагая, освяти и спаси вопиющия Ти сицевая:
Радуйся, Мати, без отца Предвечнаго Сына родившая плотию;
Радуйся, яко Тобою печали наша утоляются.
Радуйся, Живоносный милостей источник всем к Тебе прибегающим;
Радуйся, лучезарный светильниче омраченных душ наших.
Радуйся, пророческая светлая похвало;
Радуйся, апостольская нетленная славо.
Радуйся, мучеников утешение;
Радуйся, святителей укрепление.
Радуйся, неотступная Хранительнице иноческих обителей;
Радуйся, праведных непрестанное радование.
Радуйся, мира Владычице;
Радуйся, яко Тобою спасение миру содевается.
Радуйся, Богородице Дево Млекопитательнице, милостию Твоею нас присно питающая.
Кондак 13
О, Всепетая Мати, Млекопитательнице Спаса нашего! Услыши сердечная воздыхания наша, буди теплая Заступница и Молитвенница за нас пред Сыном Твоим и Богом, о еже избавитися нам от грех наших, да не пребудем вне чертога Его, но сподобимся со всеми святыми пети Ему: Аллилуиа.
( Этот кондак читается трижды, затем икос 1 и кондак 1.)
Молитва
О, Пресвятая Владычице Богородице, Пречистая и Милостивая Млекопитательнице! С любовию и благоговением припадающе ко святому и чудотворному образу Твоему, на немже видяще всех Творца и Господа, яко Младенца пречистым млеком Твоим питаема, благохваления и поклонение приносим Ти грешнии и недостойнии раби Твои и слезно молим Тя: не остави нас без Твоея помощи и заступления! Се бо грехми и страстьми разслабленни есмы и гладом духовным погибающе, алчем и жаждем пищи небесныя. Оскуде бо в нас вера, упование благое, любовь и благочестие. Несмысленни и младоумни есмы, зане присно умом и деянми младенствуим, и воли Божией не творим, ниже разумеем, что есть благое или злое. Ты же, о Царице Небесная, Питательница жизни нашея, покровом милости Твоея покрывающая вселенную всю, напитай нас от источника благости Твоея млеком Богопознания, да возрастаим в страсе Божии и смиренномудрии. Ты еси миро, излиянное любящим Тя рабом Твоим, росою молитв Твоих Богоматерних ороси нас, да принесем Богу плоды покаяния и житие нескверное. Укрепи нас малодушных, омраченных грехми просвети, востание страстей наших утоли, ко спасению вечному окорми, немощи естества нашего исцели и не остави до конца погибнути рабы Твоя, Ты бо еси едина Заступница наша и Упование, и вси надеющиися на Тя не постыдятся. Яко да Твоими теплыми молитвами в день Страшнаго Суда Христова избавимся будущаго осуждения и нескончаемыя муки, сподобимся же избранных радости и веселия вечнаго, во еже со всеми святыми воспевати Сына Твоего, Христа Бога нашего, Емуже подобает всякая слава и благодарение, честь и поклонение со Безначальным Его Отцем и Пресвятым и Благим и Животворящим Его Духом, ныне и присно, и во веки веков.
